Laudatio "Kampagneorden 2010"

Der diesjährige Kampagneorden wurde von Claudia Röderer gestaltet und mit folgenden Worten am Neujahrsempfang vorgestellt:

"Mit der Ordenskommission hab isch bisher nix zu dunn ghabt. Bei denne is alles schtreng geheim, vun denne ihrer Erwett kriegt ma net viel mit. Im ledschde Friehjohr is dann der Markus Scheurich uff misch zukumme unn hot gsaat: „Wenn isch disch frooge deet, ob du dir vorschtelle kenntscht, fa die KG en Orde zu entwerfe, was deetschn dann antworte?“ Ah isch hab dann gsaat: „WENN du misch frooge deetsch, deet isch sage JA.“ Unn so war isch mit drin ghange...
Eisch intressierd awwer viel mehr: WER ISSN DES JOHR DRUFF???
Ohgfange hawwe se scho vor üwwer 12 Johr. Dortmohls hawwe se sozusage noch „ausm Koffer gelebt“. Bei der KG uff der Bühne ware se es erschde Mol im Johr 1997. Mir hawwe se freundlisch uffgenumme, schließlich warn jo schun e paar mehr vun derre Sippe bei der KG debei – mir hawwe also gewißt, wu se hieghern. Den Koffer hawwe se irgendwann ausrangiert und sich annere Theme zugewandt, z. B. de Mährsche: Isch erinner misch an Rotkäppsche unn de Wolf, es is um Fitness gange unn um Betriebsfeschde. Bloß eens war - UNN IS - bei alle denne ihre Ufftritte gleisch:
Irgendwas is do mit der Rolleverdeilung durschenanner kumme... Im eene Johr ware se Vater unn Dochter. Im annern Johr hots e roudi Latern gewwe, mit em ganz heiße Deemsche debei… Solche Dame sin bei denne übrigens öfders uff der Bühne. Gewirkt hots, denn seit 2005 treede se zu dritt uff! Do hot dann der Tropeforscher net nur een grouße Gorilla debeighabt, sondern ah noch en ganz kleene. Hoorische DAME hots in dem Johr keeni gewwe… Dafür awwer wier im Johr druff, wu der Boy de Urlauber bedient, der eener Bauchtänzerin verfalle is. Im Weltraum unn im Wilde Weste ware ma ah scho midenne. Vun erre Hex hammer Rätsel uffkriegt: „DER PAPST BRAUCHT ES NIE“ hots do keese. Es is um de Familiename gange, DIE brauchen jedesmol fa ihrn Ufftritt – Ihr wisst wer druff is: S’MENGESE!!!"